Un debe ta un suma di sèn ku bo mester paga na un organisashon òf otro hende. Na Hulanda tin hopi hende ku debe, i no ta kos di berguensa. Buska solushon na tempu, pa e problema no bira mas grandi. Si bo no por solushoná e problema bo mes, pidi yudansa. Tin hopi organisashon ku por yudabu, manera Stichting Ocan.
Bo por tin debe na kompaníanan òf gobièrnu, pero tambe bo por krea debe ku famia òf amigunan. Mayoria biaha un debe ta kuminsá dor di un situashon ku bo no tin kontrol riba dje. Por ehèmpel, ora hende perde trabou, ora un pareha muri òf ora di malesa.
Tambe por pasa ku bo tin mas gastu ku entrada. Spesialmente si bo tin yu chikitu, bo tin mas gastu. Si bo no paga bo kuentanan na tempu, bo por haña debe. Debe no ta bai di nan mes. Anto bo por gasta bo sèn un biaha so. Si bo ke paga bo debe, lo bo mester gasta menos sèn pa un temporada.
E situashon di Shainy ta mustra dikon ta asina importante pa buska yudansa na tempu.
Konseho
No ta nada malu pa fia òf pa kumpra kos ku opshón pa paga despues. Bo tin ku paga na tempu si. Hasi un kalkulashón promé, pa bo wak si bo por kumpli ku esaki.
Si bo haña problema pa paga bèk, buska yudansa mas lihé ku ta posibel pa solushoná esaki. Asina bo ta evitá ku bo debenan ta bira mas hopi.
Yudansa ku debe
Debe no ta algu pa bo tin berguensa di dje. Ta bon pa bo sa ku bo no ta e úniko. Bo mester buska yudansa na tempu si, pa bo no haña mas debe. No purba di tapa un buraku ku otro. Si bo buska yudansa, bo por solushoná e problema di debe huntu. E no ta kosta bo sèn.
Por ehèmpel, bo por akudí na Stichting Ocan pa bo preguntanan tokante debe.
Stichting Ocan - OcanCare, Den Haag
Bo tin pregunta tokante sèn? Ocan ta pensa huntu ku bo
Stichting Ocan ta un organisashon ku ta yuda hende di origen Karibense. Nan ta ofresé sosten gratis i independiente, si bo tin pregunta tokante sèn, debe of benefisio i areglo. Si mester, nan por pone bo den kontakto ku un otro persona of instansha pa yuda bo mihó. Tuma kontakto ku e team di Stichting Ocan. Bo por yama of manda un email pa nan na Papiamentu, Spañó, Inglés of Hulandés. Na OcanCare na Den Haag bo por haña yudansa grάtis pa bo preguntanan.
- Adres: Parkstraat 32, Unit 2.14, Den Haag
- Orario: djaluna te ku djabièrnè, di 1or te 5or.
- Posibilidat pa hasi sita: djaluna, djamars i djaweps, di 1or te 4or.
Tambe bo por pidi pa OcanCare yama bo bèk. Yena e formulario di kontakto i nan lo aserka bo mas lihé ku ta posibel.
Hopi biaha tambe tin un Juridisch Loket serka di bo. Nan por sigi yuda bo i pensa huntu ku bo pa haña un solushon.
Juridisch Loket
Yudansa cu asuntonan legal
Bo tin pregunta tokante sèn òf benefisio i areglo na Hulanda? Juridisch Loket ta dunabu konseho personal gratis. Además di Hulandés, nan ta papia Inglés tambe.
Yama e number gratis pa papia ku un hende.
Tambe bo por bishitá un di e lokalidatnan serka di bo. Bo por haña e adrès i orario riba nan website (na Hulandés).