Bo ta keda faltando sèn hopi biaha? E ora benefisio por yuda. Esaki ta sèn èkstra di gobièrnu pa hende ku ta biba na Hulanda. Bo por apliká pa benefisio bo mes. Si bo mes no por, bo por apliká ku yudansa. Por ehèmpel, di un miembro di famia, un amigu, òf na Toeslagenservicepunt di Stichting Ocan.
Tin diferente benefisio, manera zorgtoeslag, huurtoeslag, kindgebonden budget òf kinderopvangtoeslag. E benefisionan aki ta pa yudabu paga bo seguro di kuido médiko, bo huur, bo gastunan pa kria bo yiunan of nan kuido. Ki tipo di benefisio bo tin derechi riba dje, ta dependé di bo situashon personal.
Derechi riba benefisio?
Bo ke sa mesora ki tipo benefisio bo tin derechi riba dje? Riba e website di Belastingdienst bo mes por wak ki tipo benefisio bo por haña. Aki bo por apliká pa nan tambe. Pa hasi esaki bo mester tin bo DigiD Bo no tin DigiD ainda? Pidi esaki riba e website di DigiD (Inglés).
Notifiká kambio di situashon
Algu a kambia den bo situashon personal? Tene na kuenta ku semper bo mester duna e informashon aki. Por ehèmpel, si bo ta bai biba huntu ku un otro persona, si bo a haña un yiu, si bo a separá/ divorsiá òf bo tin ku bai biba den un kas di kuido. Hasi esaki mas lihé ku ta posibel, sino bo ta kore e riesgo di tin ku paga sèn bèk despues.
Buska yudansa
Nos ta komprondé ku tin biaha e aplikashón pa benefisio òf pa haña un DigiD por ta difísil pa bo. Por ehèmpel, pa motibu di idioma Hulandés òf si bo tin duda. P’esei, bo por pidi yudansa di un miembro di famia òf un amigu. Tambe bo por haña yudansa na Toeslagenservicepunt di Stichting Ocan. Un empleado lo yudabu.
Kontakto ku Stichting Ocan
Stichting Ocan - OcanCare, Den Haag
Bo tin pregunta tokante sèn? Ocan ta pensa huntu ku bo
Stichting Ocan ta un organisashon ku ta yuda hende di origen Karibense. Nan ta ofresé sosten gratis i independiente, si bo tin pregunta tokante sèn, debe of benefisio i areglo. Si mester, nan por pone bo den kontakto ku un otro persona of instansha pa yuda bo mihó. Tuma kontakto ku e team di Stichting Ocan. Bo por yama of manda un email pa nan na Papiamentu, Spañó, Inglés of Hulandés. Na OcanCare na Den Haag bo por haña yudansa grάtis pa bo preguntanan.
- Adres: Parkstraat 32, Unit 2.14, Den Haag
- Orario: djaluna te ku djabièrnè, di 1or te 5or.
- Posibilidat pa hasi sita: djaluna, djamars i djaweps, di 1or te 4or.
Tambe bo por pidi pa OcanCare yama bo bèk. Yena e formulario di kontakto i nan lo aserka bo mas lihé ku ta posibel.